भोजपुरी कविता- चुनाव नियराइल
 

चुनाव नियराइल
■■■■■■■■■■■■■■■■
चारू ओर लागे कि जहर बोआइल
कि देखअ ना भाई चुनाव नियराइल

साड़ी बाटात कहीं मुर्गा काटाला
दारू के बोतल प दुनिया के हाला
बूझे ना लोग बाटे पासा फेकाइल-
कि देखअ ना भाई चुनाव नियराइल

भाई पियक्कड़ के चम बाटे गोटी
आइल चुनाव खाई बकरा के बोटी
होई बेमारी त छूटी धाधाइल-
कि देखअ ना भाई चुनाव नियराइल

गँउवा-नगर में जे लेङा लगावे
सबसे अधिक धन भाई उ पावे
मार-फउदारी से सभे डेराइल-
कि देखअ ना भाई चुनाव नियराइल

कुर्सी जे मिली त रही ना नाता
आइल चुनाव खूब ऑफर दीआता
गोड़वा प माथे के पगरी धराइल-
कि देखअ ना भाई चुनाव नियराइल

मिलेला ऑफर कि बोलअ का चाहीं
केने से बोलल जा केने से नाहीं
बाटे शरीफन के बुद्धि हेराइल-
कि देखअ ना भाई चुनाव नियराइल

नेतन के भरेला सोना के थाली
जनता त खाली बजावेला ताली
जनता के देश ह जनते पेराइल-
कि देखअ ना भाई चुनाव नियराइल

रचना- आकाश महेशपुरी
दिनांक- 05/01/2021
■■■■■■■■■■■■■■■■■
वकील कुशवाहा "आकाश महेशपुरी"
ग्राम- महेशपुर
पोस्ट- कुबेरस्थान
जनपद- कुशीनगर
उत्तर प्रदेश
पिन- 274304
मो. 9919080399