15-01-2012, 04:01 PM | #11 |
Diligent Member
|
Re: दोहावली
मिला रहै औ ना मिलै, तासों कहा बसाय ॥ काज परे कछु और है, काज सरे कछु और । रहिमन भंवरी के भए, नदी सिरावत मौर ॥ कहु रहीम कैसे निभै, बेर केर को संग । वे डोलत रस आपने, उनके फाटत अंग ॥ ॥ कागद को सो पूतरा, सहजहि में घुलि जाय । रहिमन यह अचरज लखो, सोऊ खैंचत बाय ॥ काम न काहू आवई, मोल रहीम न लेई । बाजू टूटे बाज को, साहब चारा देई ॥ कैसे निबहैं निबल जन, करि सबलन सों गैर । रहिमन बसि सागर बिषे, करत मगस सों बैर ॥ काह कामरी पागरी, जाड़ गए से काज । रहिमन भूख बुताइए, कैस्यो मिलै अनाज ॥ कहा करौं बैकुंठ लै, कल्प बृच्छ की छांह । रहिमन ढाक सुहावनै, जो गल पीतम बांह ॥ कुटिलत संग रहीम कहि, साधू बचते नांहि । ज्यों नैना सैना करें, उरज उमेठे जाहि ॥ को रहीम पर द्वार पै, जात न जिय सकुचात । संपति के सब जात हैं, बिपति सबै लै जात ॥ |
15-01-2012, 04:02 PM | #12 |
Diligent Member
|
Re: दोहावली
गगन चढ़े फरक्यो फिरै, रहिमन बहरी बाज ।
फेरि आई बंधन परै, अधम पेट के काज ॥ खरच बढ़यो उद्द्म घटयो, नृपति निठुर मन कीन । कहु रहीम कैसे जिए, थोरे जल की मीन ॥ खैर खून खासी खुसी, बैर प्रीति मदपान । रहिमन दाबे न दबैं, जानत सकल जहान ॥ खीरा को मुंह काटि के, मलियत लोन लगाय । रहिमन करुए मुखन को, चहियत इहै सजाय ॥ गति रहीम बड़ नरन की, ज्यों तुरंग व्यवहार । दाग दिवावत आप तन, सही होत असवार ॥ |
15-01-2012, 04:03 PM | #13 |
Diligent Member
|
Re: दोहावली
गहि सरनागत राम की, भव सागर की नाव ।
रहिमन जगत उधार कर, और न कछु उपाव ॥ गुरुता फबै रहीम कहि, फबि आई है जाहि । उर पर कुच नीके लगैं, अनत बतौरी आहिं ॥ गुनते लेत रहीम जन, सलिल कूपते काढ़ि । कूपहु ते कहुं होत है, मन काहू के बाढ़ि ॥ गरज आपनी आप सों, रहिमन कही न जाय । जैसे कुल की कुलवधु, पर घर जात लजाय ॥ चढ़िबो मोम तुरंग पर, चलिबो पावक मांहि । प्रेम पंथ ऐसो कठिन, सब कोउ निबहत नाहिं ॥ |
15-01-2012, 05:58 PM | #14 |
Diligent Member
|
Re: दोहावली
चित्रकूट में रमि रहे, रहिमन अवध नरेस ।
जापर विपदा पड़त है, सो आवत यहि देस ॥ ॥ छोटेन सों सोहैं बड़े, कहि रहीम यह लेख । सहसन को हय बांधियत, लै दमरी की मेख ॥ चरन छुए मस्तक छुए, तेहु नहिं छांड़ति पानि । हियो छुवत प्रभु छोड़ि दै, कहु रहीम का जानि ॥ चारा प्यारा जगत में, छाल हित कर लेइ । ज्यों रहीम आटा लगे, त्यों मृदंग सुर देह ॥ छमा बड़ेन को चाहिए, छोटेन को उत्पात । का रहीम हरि जो घट्यो, जो भृगु मारी लात ॥ ॥ |
15-01-2012, 06:00 PM | #15 |
Diligent Member
|
Re: दोहावली
जलहिं मिलाइ रहीम ज्यों, कियों आपु सग छीर ।
अगवहिं आपुहि आप त्यों, सकल आंच की भीर ॥ जब लगि जीवन जगत में, सुख-दु:ख मिलन अगोट । रहिमन फूटे गोट ज्यों, परत दुहुन सिर चोट ॥ जहां गांठ तहं रस नहीं, यह रहीम जग जोय । मंडप तर की गांठ में, गांठ गांठ रस होय ॥ जब लगि विपुने न आपनु, तब लगि मित्त न कोय । रहिमन अंबुज अंबु बिन, रवि ताकर रिपु होय ॥ जाल परे जल जात बहि, तजि मीनन को मोह । रहिमन मछरी नीर को, तऊ न छांड़ति छोह ॥ जे अनुचितकारी तिन्हे, लगे अंक परिनाम । लखे उरज उर बेधिए, क्यों न होहि मुख स्याम ॥ जे गरीब सों हित करै, धनि रहीम वे लोग । कहा सुदामा बापुरो, कृष्ण मिताई जोग ॥ 62 ॥ जेहि रहीम तन मन लियो, कियो हिय बिचमौन । तासों सुख-दुख कहन की, रही बात अब कौन ॥ जेहि अंचल दीपक दुरयो, हन्यो सो ताही गात । रहिमन असमय के परे, मित्र शत्रु है जात ॥ जे रहीम विधि बड़ किए, को कहि दूषन काढ़ि । चन्द्र दूबरो कूबरो, तऊ नखत ते बाढ़ि ॥ |
15-01-2012, 06:02 PM | #16 |
Diligent Member
|
Re: दोहावली
जैसी परै सो सहि रहै, कहि रहीम यह देह ।
धरती ही पर परत हैं, सीत घाम और मेह ॥ ॥ जो पुरुषारथ ते कहूं, संपति मिलत रहीम । पेट लागि बैराट घर, तपत रसोई भीम ॥ ॥ जे सुलगे ते बुझि गए, बुझे तो सुलगे नाहिं । रहिमन दाहे प्रेम के, बुझि बुझि के सुलगाहिं ॥ ॥ जो घर ही में घुसि रहै, कदली सुपत सुडील । तो रहीम तिन ते भले, पथ के अपत करील ॥ जो बड़ेन को लघु कहे, नहिं रहीम घटि जांहि । गिरिधर मुरलीधर कहे, कछु दुख मानत नांहि ॥ |
15-01-2012, 06:03 PM | #17 |
Diligent Member
|
Re: दोहावली
जो रहीम करिबो हुतो, ब्रज को यही हवाल ।
तो काहे कर पर धरयो, गोबर्धन गोपाल ॥ जो रहीम उत्तम प्रकृति, का करि सकत कुसंग । चन्दन विष व्यापत नहीं, लपटे रहत भुजंग ॥ जो रहीम ओछो बढ़ै, तौ ही इतराय । प्यादे सों फरजी भयो, टेढ़ो टेढ़ो जाय ॥ जो मरजाद चली सदा, सोइ तो ठहराय । जो जल उमगें पार तें, सो रहीम बहि जाय ॥ जो रहीम गति दीप की, कुल कपूत गति सोय । बारे उजियारे लगै, बढ़े अंधेरो होय ॥ |
15-01-2012, 06:03 PM | #18 |
Diligent Member
|
Re: दोहावली
जो रहीम दीपक दसा, तिय राखत पट ओट ।
समय परे ते होत है, वाही पट की चोट ॥ जो रहीम भावी कतहुं, होति आपने हाथ । राम न जाते हरिन संग, सीय न रावण साथ ॥ जो रहीम मन हाथ है, तो मन कहुं किन जाहि । ज्यों जल में छाया परे, काया भीजत नाहिं ॥ जो रहीम होती कहूं, प्रभु गति अपने हाथ । तो काधों केहि मानतो, आप बढ़ाई साथ ॥ जो रहीम पगतर परो, रगरि नाक अरु सीस । निठुरा आगे रोयबो, आंसु गारिबो खीस ॥ |
15-01-2012, 06:05 PM | #19 |
Diligent Member
|
Re: दोहावली
जो विषया संतन तजो, मूढ़ ताहि लपटात ।
ज्यों नर डारत वमन कर, स्वान स्वाद सो खात ॥ टूटे सुजन मनाइए, जो टूटे सौ बार । रहिमन फिरि फिरि पोहिए, टूटे मुक्ताहार ॥ जो रहीम रहिबो चहो, कहौ वही को ताउ । जो नृप वासर निशि कहे, तो कचपची दिखाउ ॥ ज्यों नाचत कठपूतरी, करम नचावत गात । अपने हाथ रहीम ज्यों, नहीं आपने हाथ ॥ तरुवर फल नहीं खात है, सरवर पियत न पान । कहि रहीम परकाज हित, संपति-सचहिं सुजान ॥ तैं रहीम मन आपनो, कीन्हो चारु चकोर । निसि वासर लाग्यो रहै, कृष्ण्चन्द्र की ओर ॥ तन रहीम है करम बस, मन राखौ वहि ओर । जल में उलटी नाव ज्यों, खैंचत गुन के जोर ॥ तै रहीम अब कौन है, एती खैंचत बाय । खस काजद को पूतरा, नमी मांहि खुल जाय ॥ तबहीं लो जीबो भलो, दीबो होय न धीम । जग में रहिबो कुचित गति, उचित न होय रहीम ॥ तासो ही कछु पाइए, कीजे जाकी आस । रीते सरवर पर गए, कैसे बुझे पियास ॥ |
15-01-2012, 06:06 PM | #20 |
Diligent Member
|
Re: दोहावली
दादुर, मोर, किसान मन, लग्यौ रहै धन मांहि ।
पै रहीम चाकत रटनि, सरवर को कोउ नाहि ॥ थोथे बादर क्वार के, ज्यों रहीम घहरात । धनी पुरुष निर्धन भए, करे पाछिली बात ॥ दिव्य दीनता के रसहिं, का जाने जग अन्धु । भली विचारी दीनता, दीनबन्धु से बन्धु ॥ दीन सबन को लखत है, दीनहिं लखै न कोय । जो रहीम दीनहिं लखत, दीबन्धु सम होय ॥ दुरदिन परे रहीम कहि, भूलत सब पहिचानि । सोच नहीं वित हानि को, जो न होय हित हानि ॥ दीरघ दोहा अरथ के, आरवर थोरे आहिं । ज्यों रहीम नट कुंडली, सिमिटि कूदि चढ़ि जाहि ॥ दुरदिन परे रहीम कहि, दुश्थल जैयत भागि । ठाढ़े हूजत घूर पर, जब घर लागति आगि ॥॥ दु:ख नर सुनि हांसि करैं, धरत रहीम न धीर । कही सुनै सुनि सुनि करै, ऐसे वे रघुबीर ॥ धनि रहीम जलपंक को, लघु जिय पियत अघाय । उदधि बड़ाई कौन है, जगत पिआसो जाय ॥ धन थोरो इज्जत बड़ी, कह रहीम का बात । जैसे कुल की कुलवधु, चिथड़न माहि समात ॥ |
Bookmarks |
|
|