जबसे प्यार हो जाला (भोजपुरी गीत)

[आकाश महेशपुरी]

जबसे प्यार हो जाला
■■■■■■■■■■
दुनिया भर के गम दिल के यार हो जाला
बैरी बन जाला संसार जबसे प्यार हो जाला

अपने लोगवा आपन नइखे बाटे बनल कसाई हो
जबसे तहसे बिछड़ल बानी आवे बहुत रोआई हो
लोरवा के लरी ना टूटे धार हो जाला-
बैरी बन जाला संसार जबसे प्यार हो जाला

मन ना लागे कहीं जगत में जबले ना बतिआईं हो
हाय करेजा कुहुकत रहे मन करे मरि जाईं हो
मुअलो मुश्किल बा जियल दुस्वार हो जाला-
बैरी बन जाला संसार जबसे प्यार हो जाला

चैन तनिक ना आवत बाटे कइसे कटी जुदाई हो
का सचहूँ ये दुनिया में ना होला एकर दवाई हो
तड़पे खातिर साइत नैना चार हो जाला-
बैरी बन जाला संसार जबसे प्यार हो जाला

गीतकार- आकाश महेशपुरी
दिनांक- 22/12/2008
■■■■■■■■■■■■■■■■
वकील कुशवाहा 'आकाश महेशपुरी'
ग्राम- महेशपुर
पोस्ट- कुबेरनाथ
जनपद- कुशीनगर
उत्तर प्रदेश
पिन- 274304
मो- 9919080399